Gen 18 | JAE | STEP | Ma Apômtau gêôc tau lasê gêdêŋ Abraham aŋga kamem Mamreŋa. Abraham gêŋgôŋ becobo ŋasacgêdô gêdêŋ oc kêkô ŋaluŋ.

Genesis 18

Anôtô gêjac mata Isak

1 Ma Apômtau gêôc tau lasê gêdêŋ Abraham aŋga kamem Mamreŋa. Abraham gêŋgôŋ becobo ŋasacgêdô gêdêŋ oc kêkô ŋaluŋ. 2 Eŋ gêôc mataanô sa e gêlic lau têlêac sêkô eŋ laŋônêmŋa. Eŋ gêlic êsêac ma kêlêti aŋga becobo ŋasacgêdô gêdêŋ êsêac gêja. Eŋ gewec gêdêŋ êsêac 3 ma kêsôm gebe “Ŋoc apômtau, embe ôlic aê ŋajam, go ôc lêlêc nêm sakiŋwaga atom. 4 Êsêac sêkôc bu sêmêŋ gebe akwasiŋ emkaiŋ êsêpŋa, go alêwaŋ taôm aŋgôŋ ajuŋtêna, 5 go aê jakôc gêŋ ŋagec mêŋaniŋ tekwem êsa. Aniŋ su acgom, go asêlêŋ nêm lêŋ êtiam gebe mêŋaô lasê nêm sakiŋwaga sugac.” Ma êsêac sêsôm gebe “Ôŋgôm amboac kôsôm.” 6 Ma Abraham kêlêti kêsô becobo ŋalêlôm gêdêŋ Sara gêja ma kêsôm gebe “Ôkôc polom laclu têlêac ôŋgamuc ma ôpac ŋagaôgeŋ.” 7 Ma Abraham kêlêti gêdêŋ bulimakao gêja, kêkôc bulimakao ŋalatu ŋajam toŋalêsi teŋ ma kêkêŋ gêdêŋ sakiŋwaga, taŋ kêkacgeŋ gebe eno matajajageŋ. 8 Go kêkôc su gêjac anô to su ŋakana ŋajam ma bulimakao, taŋ eŋ kêmasaŋ naŋ, ma kêkêŋ gêdêŋ êsêac. Êsêac seŋ geŋ ma eŋ tau gêjam sakiŋ êsêac gêmoa ajuŋtêna. 9 Go êsêac sêsôm gêdêŋ eŋ gebe”Nêm awê Sara gêmoa ondoc.” Ma eŋ kêsôm gebe “Tec gêmoa becobo ŋalêlôm. “ 10 Apômtau kêsôm gebe “Êndêŋ ocêsa aê oc jamu jandêŋ aôm jamêŋ êtiam ma Sara oc êkôc latu teŋ êndêŋ têm tonaŋ.” Ma Sara kêkô becobo ŋakatam lêlômgeŋ ma taŋasuŋ gêjac. 11 Mago Abraham agêc Sara têtu lauo ŋanô to ŋac sugac, nêŋ jala têtu taêsam ma lauonêŋ mêtê sêjam ôli ajôŋŋa gêwi Sara siŋ su. 12 Kêtu tonaŋŋa Sara kêômac kêêŋgimgeŋ ma kêsôm gêdêŋ tau gebe “Aê kamêliŋ sugac ma ŋoc apômtau kêtu ŋamalacanô su amboac tonaŋgeŋ, tec aêagêc atu samuc tauŋ amboac ondoc.” 13 Tec Apômtau kêsôm gêdêŋ Abraham gebe “Kêtu ageŋŋa Sara kêômac ma kêsôm gêdêŋ tau gebe ‘Katu awêanô sugac, tec jakôc ŋapalê amboac ondoc.’ 14 Gêŋwapac teŋ gêc, taŋ kêlêlêc Apômtau su me. Êndêŋ ocêsa aê jamu jandêŋ aôm jamêŋ êtiam ma Sara oc êkôc latu êndêŋ têm tonaŋ.” 15 Sara kêpa tau ma kêsôm gebe “Aê kaômac atom,” gebe kêtêc tau. Mago Apômtau kêsôm gebe “Magobe, kôômacgac.”

Abraham keteŋ kêtu Sodomŋa

16 Go lau tau dêdi ma sêc sêja. Ma êsêac mateŋ gê Sodom. Ma Abraham kêsêlêŋ gêwiŋ êsêac gebe êkêŋ êsêac aŋga intêna. 17 Ma Apômtau kêsôm gebe “Aê jansaŋ gêŋ, taŋ gabe jaŋgôm naŋ, auc êndêŋ Abraham oc êtôm me. 18 Kajalagac gebe Abraham êtu laum kapôêŋ to ŋajaŋa, ma lau tom-tom samob têtap mec ŋamoasiŋ sa aŋga ênê, 19 gebe aê kajaliŋ eŋ sa gebe êjatu nê latui to nê lau samob, taŋ sêndaŋguc eŋ naŋ, gebe sejop aêŋoc intêna ma sêŋgôm ŋoc biŋ ŋanô êsa to sêmêtôc lau naêndêŋgeŋ gebe aê jakêŋ gêŋ, taŋ gajac mata gêdêŋ Abraham naŋ, êndêŋ eŋ.” 20 Go Apômtau kêsôm gebe “Ŋaonda kêpi Sodom to Gomora kêtu kapôêŋ ma êsêacnêŋ sec gêjam sêga. 21 Tec aê gabe jasêp jana jalic acgom, êsêac samob sêgôm kêtôm ŋaonda, taŋ gaŋô naŋ, me masi. Embe masi, mago gabe jajala.”

22 Ma lau tau sêsêlêŋ sepeŋ Sodom, mago Apômtau gacgeŋ kêkô gêwiŋ Abraham. 23 Go Abraham kêtu gasuc ma kêsôm gebe “Aôm gobe onseŋ lau gêdêŋ to lau sec su êtômgeŋ biŋŋanô me. 24 Embe lau gêdêŋ 50 sêŋgôŋ malac tau, oc gobe onseŋ malac su amboac tonaŋgeŋ me ôsuc malac ŋasec ôkwi êtu lau 50, taŋ sêŋgôŋ malac naŋŋa. 25 Ônac jaê biŋ amboac tonaŋ, aôm ôŋgôm gêŋ amboac tonec gebe onseŋ lau gêdêŋ sêwiŋ lau sec naŋ atom. Embe ôŋgôm, ŋacgêdêŋ oc êndac êtôm ŋac sec. Ônac jaê biŋ amboac tonaŋ. Ŋac-kêmêtôc-nomwaga êmêtôc naêndêŋ- geŋmaŋ.” 26 Ma Apômtau kêsôm gebe “Aê embe jatap lau gêdêŋ 50 sa sêŋgôŋ malac Sodom, oc jasuc malac samucgeŋ ŋabiŋ ôkwi êtu êsêacŋa.” 27 Abraham gêjô eŋ awa gebe “Aêma katôm kekop to wao, mago katoc tauc sa gebe janam biŋgalôm jawiŋ Apômtau. 28 Moae lau gêdêŋ 50 solop atom, moae lemeŋ teŋ masi. Aôm gobe onseŋ êsêac su êtu lemeŋ teŋ masiŋa me.” Ma eŋ kêsôm gebe “Aê embe jatap 45geŋ sa, oc janseŋ êsêac su atom.” 29 Abraham awa gêjac eŋ kêtiam ma kêsôm gebe “Moae ôtap 40geŋ sa aŋga ônê.” Eŋ gêjô eŋ awa gebe “Êtu 40ŋa aê gabe jaŋgôm gêŋ tau ŋanô êsa atom.” 30 Go Abraham kêsôm gebe “Apômtau, ôlic aê sec atom, aê jasôm biŋ teŋ êwiŋ. Moae ôtap 30geŋ sa aŋga ônê.” Eŋ gêjô eŋ awa gebe “Aê embe jatap 30geŋ sa, oc jaŋgôm gêŋ tau ŋanô êsa atom.” 31 Abraham kêsôm gebe “Op, aê katoc tauc sa gebe janam biŋgalôm jawiŋ Apômtau, moae ôtap 20geŋ sa aŋga ônê.” Eŋ gêjô eŋ awa gebe “Aê janseŋ êsêac su atom êtu 20geŋŋa.” 32 Go Abraham kêsôm gebe “O Apômtau, ôlic aê sec atom, aê jasôm biŋ tageŋ tonec êwiŋ. Moae ôtap 10geŋ sa aŋga ônê.” Eŋ gêjô eŋ awa gebe “Aê janseŋ êsêac su atom êtu 10geŋŋa.” 33 Apômtau gêjam biŋgalôm gêwiŋ Abraham e su ma gêc gêja. Ma Abraham tau gêmu gêja nê gamêŋ.